stêra guharên asîmanan

senfonaya bêxewiyê

şirîka tenêtiya rondikên bidizî

dilêriya li pêşberî mirinê

pirpirîka reqsa biharê

afirênera beyanên min

ewqasî li benda te mam

dengê şadiyê dev ji min berda

cihên

tewafa ramûsanan

xwe li awirên min dipêçin

stêra gerok

di nava min de mezin dikin

zivistanên vir

avê di gewriya min de dikin kevir

ewqasî li benda te mam

dengê şadiyê dev ji min berda

efsana sîmirê hawaran

firokiya siwarê hespê çîrokan

dûyê

pixûriya hurmûzgehan

dar

ewr

rê

germ

û sarî

Têlî ya Husênê Farî

li bendewariya min digirîn

ewqasî li benda te mam

dengê şadiyê dev ji min berda

şevên çav tenî

baranên tî

zinarên bîrovgirtî

hevrazên mija dûr

sernişivên gêj

rawestgehên serxweş

û tofanên bê zayîn

li bendewariya min barîn

ewqasî li benda te mam

dengê şadiyê dev ji min berda

baweriya ol û felsefê

nêrîna çep û rastê

îro û dawiya jînê

keştiya henasa hebûn û nebûnê

êşa vebûna rayên xwînê

qirçe qirça darbestên birîndar

birûska

şikestokên giyanê min şikandî

li bendewariya min dinalin

ewqasî li benda te mam

dengê şadiyê dev ji min berda 

05.01.2010

 Kamran Simo Hedilî