Serokê Dadgeha Makezagonê yê Komara Tirkiyê Haşim Kılıç, îro danê êvarê biryarê daweya girtina DTP'ê bi civîneke çapemeniyê da eşkerekirin. Kılıç, da zanîn ku, "dema çalakiyên DTP'ê bi yên rêxistina teror re bê nirxandin; tê dîtin ku li hember yekparebûna dewletê bûye mîhraq û biryarê girtinê ya vê partiyê bi pirraniya dengan hatiye girtin.'' Dadgehê herweha biryarê 5 sal qedexekirina siyasetê da Hevserokê Giştî yê DTP'ê Ahmet Türk û parlamentera DTP'ê ya Amedê Aysel Tugluk'ê. Tevî Türk û Tugluk'ê ji bo 36 DTP'yî yan, heman biryar hate dayîn. Bi vê yekê, di meclîsa tirk de jimara parlamenterên DTP'ê ji 21'ê daketin 19'yan.

Hevserokê Giştî yê DTP'ê Ahmet Türk, piştî eşkerekirina biryarê girtinê daxuyaniyek kurt da çapemeniyê û got: "Tirkiye wê bi girtina partiyan nikaribe pirsgirêkê çareser bike. Em li pişt biryarên ku me berê girtibûn disekinin. Emê xebatên xwe yên ji bo aşitî û demokrasiyê bidomînin. Dê aşitî û demokrasî hetmen biserkeve.''

Nûçeya biryara girtina DTP'ê, ji aliyê ajansên cîhanê ve jî wek "flaş" hate dayîn. Associated Press, nûçe weha gihand aboneyên xwe: "Dadgeha Makezagona Tirk, biryar da ku partiya kurdperwer ji ber têkiliyên wê yên bi PKK'ê bê girtin.'' Ajansek nûçeyan ya din AFP'yê jî bi vê hevokê bûyer ragihand: ''Serokê Dadgeha Makezagonê yê Tirk, da zanîn ku, partiya kurdperwer hate girtin." DTP, wê sibê seet di 12:00an de li ser biryarê girtinê derkeve pêş çapemeniyê.

Rizgarî Online/Yado Ciwan