Kovara VATEyi seba xebatêka newe û hîraye cay buroyê xo ê Dîyarbekirî ard cayêko newe. Verê cû no buro Dîyarbekir de hetê semtê Yenî Şehîrî de bi. No ca hem qijek bi hem zî cayêko merkezî nêbi. Seba xebatêka bi plan û bi program cayêko hende bikêr nebi. No ca zî avuqatêko fedekar birêz Sitqî Zîlanî mîyanê buroyê xo de yew oda abirnabi û texsîsî Kovara Vateyî kerdbi. Berpisîyarê kovare nê cayî de nêzdî di serrî xebata vilakerdişê Kovara Vateyî kerdê.
Nê berpirsîyarî ewnîyê ke Dîyarbekir de xebate aver şina û hem kovare hem zî xebata ziwanî rê talep zêdîyo êdî mecbur mendê cayêko hîna gird fînê dest û hewelîyê ne cayî.

No cayo neweyî 13.12.2009 saete 13.00 bi kokteylêk akerdê. No ca hem hetê gîrdî ey ra hem zî hetê cayê ci de hîna zaf rindo. No bîna bi heme hetî ra erjîyaye yo. Hîrê-çar odayê ci estê. Salonêka girde esta. Seba xebate û seba vilakerdişê kovare hîna dest dano. Nika ra şaro ke xebata ziwanî ra û xebata kulturî ra hes keno zaf kefweş bîyê.

Nê kokteylî de zaf kurdê namdarî sey Talat Înançî, sey Seîd Verojî sey Îbrahîm Guçlu, sey Sêx Mîzbehî roşinvîrî bibî. Hema-hema heme îdarekerê sazîyê ke xebata kultur û ziwanî kenê emebî. Serokê KURDÎ-DERî bi rêz dr. Remazî Azîzoglu pa heyeta xo amebi. Temsîlkarê Enstîtuya Kurdî, temsîlkarê Komaleyê Nivîskarê Kurdan amebî. Serokê îdarekerê komelaya newe birêz Edîp Polat amebi. Zaf nuştoxê kurdan zî bibî.

Pêro pîya nêzdî di se heb însani nê akerdişî de ameybî pêser. Zafêr zî wendekarê Kovara Vateyî emeybî. Şertê ê rojî hende hol nêbi reyna şarî piştî da nê akerdişî û beşdarê nê akerdişî bîy. Hem varayiş bi û hem zî serd bi. Bê nê şertanê negatîfî seke şima zî zanê no prosesus de moralê ma kurdan hende ca de nîyo. Partîya DTP padîya. Seba nê padayîşî her ca de çalekî estê. Xora çalekîyê hîna girdî Dîyarbekirde virazîyenê. O roj zî Dîyarbekir de çalekîya partîya DTP bibî. Eke nê şertanê negatîfî û nê çalekîyan ra nêbîne ko şar hîna zam biameyne.
Nê akerdişî de berpirsîyarê buroyî xêrameyîş kerd. Dima derheqê nê buroyîde agahî da şarî. Derheqê xebata ma vernî de malumatî da beşdarbîyoxan. Dima Ehmet Dirihî derheqê vilakerdiş û peydakerdişê Kovara Vateyî de malumat da. Ehmedî ra pey beşdarbîyoxan ra çend kesî fikr û vinayişanê xo ardê ziwan.

Peynî de no şar pêro hem kola û pasta werd hem zî odayê nê buroyî geyrê. No şar pêro berpirsîyaran pîroz kerd û keyfweşîyanê xo bi berpirsîran reyde bare kerdî.

www.radioasti.org

Mehmud NÊŞITE